Neidentifikovani naoružani napadači ubili su 18 ljudi, uključujući gradonačelnika, kada su otvorili vatru juče u gradskoj vijećnici u jugozapadnoj državi Gerero, koja je pogođena nasiljem bandi, saopštile su vlasti.
Među ubijenima u San Migel Totolapanu su gradonačelnik Konrado Mendoza, njegov otac i bivši gradonačelnik Huan Mendoza te drugi lokalni funkcioneri, navodi se u saopštenju države Gerero. Još dvije osobe su ranjene.
Zamjenik ministra bezbjednosti Rijardo Mehia sugerisao je da je nasilje proizišlo iz sukoba između suparničkih grupa La Familia Michoacana i Los Tequileros.
Govoreći na redovnoj vladinoj konferenciji za novinare, rekao je da se provodi operacija kako bi se pronašli počinioci, a istražioci provjeravaju video na kojem se čini da Los Tequileros preuzimaju odgovornost za ubistva.
Meksički dnevnik El Universal ranije je izvijestio da se čini da su naoružani napadači izveli koordinisani niz napada unutar zgrade kako bi ubili gradonačelnika.
"U međuvremenu je u centralnoj državi Morelos državna poslanica Gabriela Marin ubijena iz vatrenog oružja, a njen tjelohranitelj ranjen je ispred apoteke juče naveče", rekao je Mehia, prenosi "Index.hr".
.webp)
