Prema novoj odluci Vlade Slovenije, u tu zemlju će se moći ući uz negativan pi-si-ar test koji se može dobiti i u trećim zemljama ili u institucijama koje priznaje Slovenija ili uz negativne brze testove na antigen, koji se mora uraditi u državama članicama EU ili u šengenskom području.

Ukinuti su brzi testovi na pet graničnih prelaza koje je Slovenija radila od 25. decembra.

- Od danas više neće biti moguće sprovoditi ove brze testove na naših pet graničnih tačaka. Ako nemate negativan test, jedina opcija biće odlazak u karantin - rekao je ministar unutrašnjih poslova Aleš Hojs.

Što se tiče prekida karantina, on se može prekinuti negativnim testom poslije pet dana, a promjena je u tome što će ga od danas moći prekinuti i oni koji imaju privremeni ili stalni boravak u Sloveniji, a ne više samo slovenački državljani, prenijeli su slovenački mediji.

Ulazak u Sloveniju iz zemalja koje su na crvenoj listi bez upućivanja u karantin ili bez podnošenja negativnog testa od danas je dozvoljen licima koja svakodnevno ili povremeno prelaze granicu zbog učešća u obrazovanju ili naučnim istraživanjima, ali pritom moraju priložiti dokaz.