U nastavku četvrtfinala plej ofa Istočne konferencije američke profesionalne košarkaške lige (NBA) Čikago je jutros kao gost savladao Bruklin sa 90:82 i izjednačio rezultat na 1:1 u seriji u kojoj se igra do četiri pobjede.

Na Zapadu, pak, Klipersi su opet iskoristili prednost domaćeg terena i pobjedom 93:91 protiv Memfisa poveli sa 2:0 u seriji.

Već viđeni produžetak u Stejpls centru spriječio je plejmejker Klipersa Kris Pol koji je košem u posljednjoj sekundi donio svom timu drugu pobjedu.  Sa 24 poena i devet asistencija Pol je, bez sumnje, bio najzaslužniji za trijumf svog tima u kojem je odličnu partiju pružio i Blejk Grifin čiji je učinak iznosio 21 koš i osam skokova.

U poraženom Memfisu najefikasniji je bio Majk Konli sa 28 poena, pri čemu je imao i devet asistencija, a zapaženu ulogu imao je i Španac Mark Gasol koji je utakmicu završio sa 17 koševa i sedam uhvaćenih lopti.

Do izjednačenja protiv Bruklina, "bikove" su predvodili Luol Deng i Karlos Buzer. Prvi je, uz 15 poena imao i deset uhvaćenih lopti, dok je učinak Buzera iznosio 13 koševa i 12 skokova.
U redovima Bruklina najjači utisak ostavio je Bruk Lopes sa 21 poenom.

Rezultati:
ISTOČNA KONFERENCIJA:
Bruklin - Čikago 82:90 (1:1 u seriji)
ZAPADNA KONFERENCIJA:
L.A. Klipers - Memfis 93:91 (2:0)

(Tanjug)