Konstantin Došljak (13), bokserski šampion, želio je da podijeli svoju priču, kako se to drugoj djeci ne bi dogodilo.
Kaže da ono što je on proživio ne bi poželio ni najgorem neprijatelju, u novogodišnjoj noći ostao je bez dva prsta nakon što mu je eksplodirala petarda u ruci.
"Ja sam bio sa drugarom u kraju, šetali smo, ja sam kod sebe imao male petarde... Meni moji roditelji ne kupuju petarde i ne dozvoljavaju da ja bacam i protiv su petardi. Mi smo šetali, htjeli smo da zapalimo jednu. Došao je čovjek i pitao ko je bacio petardu i pitao 'Zašto vi bacate te male prdavce?'. Mi smo tu prećutali i onda nas je pitao gdje smo kupili petarde, mi smo rekli u radnji", kazao je Konstantin u Novom vikend jutru Jovane Jeremić na TV Pink.
Konstantin je rekao da je taj čovjek zatim pozvao njih da dođu, onda je njegovom drugu dao tu veliku petardu od 9 grama baruta, onda je njemu dao, sebi, pa opet Konstantinu, pa njemu opet.
"Onda smo ukupno imali drug i ja i taj čovjek po dvije. Dao nam ih je iz kutije. Rekao je da bacimo jednu tu, i to je baš jako puklo. Rekao je ćao i otišao. Mi smo se onda spustili jednu ulicu dole... Ja sam tog čovjeka viđao u kraju, ne znam ga lično, kako se zove, baš ništa", rekao je Konstantin i dodao:
"Moj drug je ponio upaljač i upalili smo petarde. Meni se petarda upalila, pa ugasila, drugar je svoju bacio, ja sam osjetio u ruci da nešto dimi, petardu gledam kako gori, ja da je bacim, kad ona pukla, sve meni krv po faci... Ja sam osjetio kao malo da ne vidim, ostalo je to mutno... Onda su otišli djelići prsta, domali i mali. Žena nam je sa terase bacila led da stavim dio prsta. Bilo je puno krvi... Nisam znao gdje mi je dio prsta, našli smo i stavili u kesu. Onda sam razmišljao da li da zovem pomoć ili da idem kući", ispričao je dječak.
Hrabri Konstantin je rekao da je razmišljao kako da kaže roditeljima, kako su zaustavili auto i da ih je čovjek odvezao.
