Influenserka Džoana Maskarenhas je osuđena na dvije i po godine uslovne kazne zbog nasilja u porodici.
Ona će morati da plati svojoj trogodišnjoj kćerki 830 funti (1.000 evra) kao odštetu što ju je "ponizila".
U viralnom snimku iz 2023. godine, portugalska influenserka je rekla pred kamerom da je potapala kćerku u hladnu vodu kako bi smirila njen napad bijesa iliti tantrum.
"To je najefikasniji način da ih smirite“, rekla je smijući se.
Džoana je prepričala dvije specifične prilike kada je koristila metodu "smirivanja hladnom vodom".
Jednom je stavila svoje dijete u kadu dok je ona na sebi imala pidžamu i istuširala je hladnom vodom. A sljedeći put je to uradila kada je dijete bilo nago, pa je napunila kadu vodom koja je djevojčici došla brade.
Sudija lokalnog krivičnog suda u Lisabonu rekao je da, iako je majka zaustavila dječje izlive bijesa, njene metode nisu predstavljale "adekvatan oblik njege" i da su funkcionisale samo zato što je njena kćerka bila "uplašena".
Sudija je tvrdio da bi ove radnje bile "ponižavajuće" za drugu stranu, ako se izvode nad odraslim osobama.
Influenserkin advokat rekao je da je Džoana donijela "pogrešnu odluku", ali ne i onu koju bi trebalo smatrati zločinom, tvrdeći da nije nanijela nikakvu fizičku ili psihičku štetu djevojčici.
Influenserka je dobila uslovnu kaznu jer nikada ranije nije počinila krivično djelo. Najavila je namjeru da uloži žalbu na presudu.
Prema pisanju lista "Еkspreso", snimak incidenta izazvao je ogorčenje na mreži. Nakon što je video postao viralan, influeserka je izbrisala sve svoje naloge na društvenim mrežama. Kako pišu mediji, Nacionalna komisija za promociju prava i zaštitu djece i mladih uskoro će komentarisati slučaj.
