Severina Kojić, koja je juče izgubila bitku za starateljstvo nad sinom Aleksandrom, oglasila se na društvenim mrežama i emotivnom porukom objasnila kako se osjeća.
Kojićeva, koja je sinoć morala da odvede sina Aleksandra kod nekadašnjeg partnera, biznismena Milana Popovića jer je odlukom suda on od sada njegov staratelj, napisala je da je sve ovo za nju „ružan san iz kojeg će se brzo probuditi“.
– Znaš sine, to su samo neki papiri koje je neko ispisao i postoje neka slova koja je neko natipkao u riječi, koja ne vrijede za nas dvoje. Oduzeli su nas jedno od drugog fizički, ali to je sve što su mogli. Nakon sedam i po godina sada su mi dali da te viđam 88 sati mjesečno. Hej, pa to je ipak 88 sati. Mogli su i manje, sve su mogli i sve su napravili da nas povrijede – stoji u emotivnoj poruci koju je Severina uputila svom sinu Aleksandru.
Navela je da ona i njen sin mogu da naprave čuda u tih 88 sati. Severina je podsjetila da odlukom suda od sada može samo dva puta mjesečno prespavati sa svojim sinom i uspavati ga.
– Hej, koliko se mi možemo ispričati za te dvije večeri, oni ne mogu ni zamisliti. Sve druge večeri mama će te zamišljati. Jer ti se pretvaraš u svaku moju misao i svaka moja misao se pretvara u tebe. Mogu mi te neki strani ljudi zabraniti, ali mi ne mogu zabraniti da te volim, da mislim na tebe svaku sekundu. Ovo je, sine, samo ružan san i mama obećava da ćemo se brzo probuditi – navela je Severina.
Poručila je malom Aleksandru da će se opet njih dvoje uspavljivati svaku veče, a do tada će ona uvijek biti uz njega jer će "ovo brzo proći".
– Oprosti što ti nisam stigla ni objasniti šta se juče dogodilo, imali smo puno važnijih stvari. Gledali smo “Toy story 4”, pa smo pekli palačinke, pa smo se igrali zoološkog. Nije bilo vremena za tugu, ni za objašnjenje. Morala sam te odvesti. Išli smo sa osmijehom – navela je Severina, otkrivajući kako su izgledali posljednjii trenuci sa sinom prije nego ga je odvela u kuću oca Milana Popovića.
Pomenula je i sutkinju koja je donijela presudu, navodeći da ta „čudna teta“ igra sa njihovim životima, a koja ne zna ništa o njima.
– Teta je na višem nivou igrice. Uvela je nova pravila u igricu zvanu “hrvatsko pravosuđe”. Mi samo nismo ovo ni slutili, nismo znali pravila. To su njena pravila, njihova, ne naša. Samo ti meni budi dobro i sve će biti dobro. Mama je dobro, Robine moj, tvoj Batman te čeka. I oprosti im sine, jer stvarno ne znaju šta čine – navela je Severina na kraju svoje poruke.
.webp)
